Энэ оны 11-р сарын сүүлээр Дархан сумын 24-р хорооллын нутаг дэвсгэрт зөвшөөрөлгүй хашаа хатгаж сахиул айл буулгасан зөрчил гаргасныг мэргэжлийн байгууллагаас албан шаардлага тухайн айл, иргэнд удаа дараа хүргүүлжээ. 

Удаа дараа тавьсан шаардлагыг биелүүлээгүй тул аймгийн Засаг даргын 12-р сарын 6-ны өдрийн захирамжаар Дархан сумын Засаг даргаар ахлуулсан ажлын хэсэг газар дээр нь ажиллалаа.

Зөрчил гаргасан иргэн эрчим хүчний хамгаалалтын зурваст хашаа хатган хашаандаа сахиул айл буулгаж, амины орон сууцны зориулалттай газарт энгийн галлагаатай зуух ашигласан, нүхэн жорлон хийсэн нь холбогдох хууль заалтуудыг зөрчсөн тул тус айл, хашааг албадан буулгаж зөрчлийг арилгав.

Ихэнх гол, мөрний мөсний зузаан тогтвортой нэмэгдэж байгаа хэдий ч 2023 оны мөн үе болон олон жилийн дунджаас 10-35 см бага, мөсний зузаан голын нийт уртын дагууд харилцан адилгүй байна.

Мөсний даац хүн, мал, машин тэрэг явахад хангалттай хэмжээнд хүрч бэхжээгүй байгаа тул цаг хожих, зам товчлох зэргээр мөсөн дээгүүр явах болон авто тээвэр хийхгүй байхыг онцгойлон анхааруулж байна.

#Хариуцлага_таныг_хамгаална 

Томуу, томуу төст өвчний дэгдэлт ихсэж байгаатай холбогдуулан Өрхийн эрүүл мэндийн төвүүд уртасгасан цагаар буюу ажлын өдрүүдэд 08.30- 19.00 цаг,амралтын өдрүүдэд 11:00-15:00 цаг хүртэл ажиллаж байна.

- Госхот ӨЭМТ:7037-3012, 7037-3013

- Мэдстоб ӨЭМТ:7037-3009, 7037-3010

- Аминхолбоо ӨЭМТ:7037-7792, 7037-3008

- Түвшинхолбоо ӨЭМТ:7037-7164, 7037-3014

- Гэрэлтэй ӨЭМТ:7037-4170, 7037-3011

Эдийн засгийн яам болон “Төр, хувийн хэвшлийн түншлэлийн төв” ТӨААТҮГ-аас өнөөдөр /2024.12.10/ “Төр хувийн хэвшлийн түншлэл” сэдэвт сургалт зохион байгуулж байна. 

Монгол Улсын Их хурал, Засгийн газраас баримталж буй нэг бодлогын чиглэл нь төр, хувийн хэвшлийн түншлэлийг бэхжүүлэх асуудал юм.

Энэ хүрээнд Дархан-Уул, Орхон, Хөвсгөл аймгийн Засаг даргын тамгын газар, Хөгжлийн бодлого, төлөвлөлт, хөрөнгө оруулалтын хэлтсээс ирүүлсэн хүсэлтийн дагуу Төр хувийн хэвшлийн түншлэлийн тухай хууль, тогтоомж, олон улсын туршлага, "Төр, хувийн хэвшлийн түншлэлийн төв" төрийн өмчит аж ахуйн тооцоот үйлдвэрийн газрын талаарх мэдээлэл өгөх сургалтыг зохион байгуулж байна. Сургалтад аймгийн ИТХ-ын төлөөлөгчид, аймаг, сумын ЗДТГ-ын мэргэжилтнүүд, хувийн хэвшлийн төлөөлөл оролцож байна.

Аймгийн ИТХ-ын дарга А.Янжмаа болон ИТХ-ын Хөгжлийн хороодын дарга нар өнөөдөр /2024.12.09/ Дотоодын цэргийн 822 дугаар тусгай салбарын хариуцан ажилладаг Дархан хотын Улсын онц чухал объектуудын хамгаалалтын нөхцөл байдалтай танилцав. Улсын онц чухал объект болох Цэвэр ус ундны хангамжийн эх үүсвэрээс 90 метр зайд  олон нийтийн байгууламж байрлах нь Монгол Улсын Усны тухай хуулийн гуравдугаар бүлэг 22.1.-т ”Усны нөөцийг хомсдох, бохирдохоос хамгаалах, үер, усны гамшгаас сэргийлэх зорилгоор усны сан бүхий газар, усны эх үүсвэрт онцгой болон энгийн хамгаалалтын, эрүүл ахуйн бүс тогтооно”, 22.2.-т ”Усны сан бүхий газрын эргээс 50 метрээс доошгүй зайд болон гол мөрний татамд онцгой хамгаалалтын бүс тогтооно”, 22.3.-т “Усны сан бүхий газрын эргээс 200 метрээс доошгүй зайд энгийн хамгаалалтын бүс, ус хангамжийн эх үүсвэрээс 100 метрээс доошгүй зайд эрүүл ахуйн бүс тогтооно”  гэсэн заалтуудыг зөрчжээ. 

Тиймээс Дотоодын цэргийн 822 дугаар тусгай салбарын хамгаалалтад байх Улсын онц чухал объектын торон хашааг шинэчлэх шаардлагатай байгааг аймгийн Цагдаагийн газрын дарга Б.Нацагдорж, Дотоодын цэргийн 822 дугаар тусгай салбарын захирагч, хошууч О.Ганданпилжээ нар танилцууллаа. Уг асуудалд Төлөөлөгчид анхаарал хандуулж, Хурлын хуралдаанд танилцуулж, хэлэлцүүлнэ гэв.

Дарханчууд бүх улиралд нийтийн их цэвэрлэгээ хийдэг уламжлалыг хэвшил болгосон. Хог хаягдлын тухай хуулийн 10 дугаар зүйлийн 10.2.10-т зааснаар Аж ахуйн нэгж, байгууллагын орчны 50 метр хүртэлх нийтийн эдэлбэр газрын хог хаягдал, цас мөсийг тухайн аж ахуйн нэгж цэвэрлэх үүрэгтэй. Иймээс төрийн болон аж ахуйн нэгж байгууллагууд гадна орчныхоо 50 метр хүртэлх, харин иргэд байр, хашаа, гудамж орчны цас мөсийг цэвэрлэж, явган зорчигч болон авто машин аюулгүй зорчих нөхцөлийг бүрдүүлэн ажиллахыг нийт Дарханчууддаа уриалж байна.

"ЭРСДЭЛГҮЙ ХОТЫН ТӨЛӨӨ-ХАМТДАА"