Улсын Онцгой комиссын орлогч дарга, ОБЕГ-ын дарга Хошууч, генерал Г.Ариунбуян Булган, Орхон, Дархан-Уул, Сэлэнгэ аймгийн хаваржилтын нөхцөл байдалтай танилцах, аймгийн Онцгой комисс, Гамшгийн эрсдэлийг бууруулах орон нутгийн зөвлөл, Онцгой байдлын газар, салбар нэгжүүдийн үйл ажиллагаа, тулгамдаж буй асуудалтай газар дээр нь танилцаж алба хаагчдад мэргэжил, арга зүйн зөвлөмж, зөвлөгөө өгч ажиллаж байна.  

Аймаг орон нутгийн удирдлага, Онцгой комисс, Гамшгийн эрсдэлийг бууруулах орон нутгийн зөвлөл аймгийн иргэдийн аюулгүй байдлыг хангах, амьдрах орчныг сайжруулах зорилгоор олон төрлийн томоохон арга хэмжээг авч хэрэгжүүлж, шийдвэрлэж буйн сайшаалтай байгааг тэрээр онцоллоо. Улсын Онцгой комиссын орлогч дарга, ОБЕГ-ын дарга бие бүрэлдэхүүнд дараах үүрэг чиглэлийг өглөө. 

Үүнд: 

- Үндэсний сөрөн тэсвэрлэх стратегийн нэг бүрэлдэхүүн хэсэг болох гамшгийг тэсвэрлэх чадавхыг олон нийтийн оролцоонд тулгуурлан дээшлүүлэх;  

- Ерөнхий боловсролын сургуулиудад заадаг “Аюулгүй амьдрах ухаан” сургалтын хөтөлбөрийг хэрэгжүүлэхэд онцгой анхаарч, оюутан, сурагч, хүүхдүүдэд гамшгаас хамгаалах мэдлэг, чадвар олгох ажлыг хэрэгжүүлэх,

 - Гамшгаас урьдчилан сэргийлэхэд аж ахуйн нэгжүүдийн оролцоог нэмэгдүүлэх, өмчийн хэлбэр харгалзахгүй аж ахуйн нэгж, байгууллагуудыг сар бүрийн сүүлийн долоо хоногийн “Пүрэв” гарагт аюулгүй байдлыг үнэлэх дадлыг хэвшүүлэх;  

-  Хавсарсан гамшгийн үед, тухайлбал гэнэтийн газар хөдлөлт, түүнээс үүдэлтэй цахилгаан эрчим хүч, дулаан тасарсан зэрэг нөхцөл байдал үүссэн үед хэрхэн ажиллах талаарх төлөвлөгөөг боловсруулж хэрэгжүүлэх; 

- Мал, амьтны гоц халдварт өвчнөөс урьдчилан сэргийлэх, аймаг, сумын хэмжээнд шаардагдах малын эм, бэлдмэл, вакцин, халдвар хамгааллын хувцас, халдваргүйтгэлийн багаж, тоног төхөөрөмж, бодисын нөөцийг бүрдүүлэх, отор нүүдэл, малын шилжилт хөдөлгөөнийг дагасан тандалтыг тогтмол хийх;  

 - Орон нутгийн хэмжээнд гамшгаас хамгаалах алба, мэргэжлийн анги, төрийн байгууллагуудын гамшиг, аюулт үзэгдлийн үед үүрэг гүйцэтгэх чадавхийг нэмэгдүүлэх хөрөнгө, оруулалтыг нэмэгдүүлэх;  

 - Хаврын улиралд тохиолддог хүчтэй салхи, шуурга, ой, хээрийн түймэр, шар усны үерийн  аюулт гамшигт үзэгдлээс урьдчилан сэргийлэх, эрсдэлийг бууруулах, шуурхай хариу арга хэмжээ авч хэрэгжүүлэх нарийвчилсан төлөвлөгөө гаргаж, хэрэгжилтийг хангах;  

- Цаг агаарын гамшигт, аюулт үзэгдлийн сэрэмжлүүлэг мэдээллийг иргэдэд бүх төрлийн хэвлэл, мэдээллийн хэрэгслээр шуурхай тогтмол хүргэх, холбогдох байгууллагуудыг мэдээ мэдээллээр хангах, иргэд олон нийтэд мэдээлэл дамжуулах системийг сайжруулах;