вөлжилтийн бэлтгэл ажлыг хангах хүрээнд өнгөрсөн 8-р сард аймгийн Засаг дарга Дархан сумын 1-р багийн 8-р цэцэрлэгийн дулааныг бүрэн шийдвэрлүүлэхээр газар дээр нь ажилласан. 

Үүний үр дүнд 2015 онд ашиглалтад орсон цагаасаа хойш уурын зуухаар халаалт дулаанаа шийдэж ирсэн тус цэцэрлэг 9-р сарын 15-наас эхлэн төвийн нэгдсэн дулааны шугамд холбогдлоо. 

Ингэснээр тус цэцэрлэгт суралцдаг 150 гаруй хүүхэд, 30 гаруй багш ажилчид төвийн дулаанд холбогдсон тохитой орчин нөхцөлд сургалтын үйл ажиллагаагаа явуулж байна.

Агаарын бохирдлыг бууруулах ажлын хүрээнд уурын зуухаар халаалт дулаанаа шийдвэрлэж байсан Гал унтраах 54-р анги болон Дархан сумын 8-р цэцэрлэгийг төвийн шугамд холбож 2 уурын зуухыг ийнхүү буулгаж байна.

Дархан-Уул аймгийн Онцгой байдлын газрын Дархан сум дахь, хоёрдугаар зэрэглэлийн Гал түймэр унтраах, аврах 54 дүгээр анги нь 1995 оноос хойш 30 жилийн хугацаанд нам даралтын зуухаар халаалт авч, үйл ажиллагаагаа явуулж ирсэн билээ.

Алба хаагчдын ая тухтай, стандартын шаардлага хангасан орчин нөхцөлийг бүрдүүлэх зорилгоор аймгийн 2025 оны төсвийн тодотголд 834,7 сая төгрөгийн санхүүжилт шийдвэрлэгдэж, тус ангийн төвийн халаалтын шугамд холбогдох ажил эхэлсэн. Үүнтэй зэрэгцэн Онцгой байдлын ерөнхий газрын санхүүжилтээр дотоод шугам сүлжээг халаалтад холбох ажил ид өрнөж байна. Одоогийн байдлаар уг ажлын гүйцэтгэл 85 хувьд хүрээд байгаа бөгөөд бүрэн дууссанаар алба хаагчдын эрүүл, ая тухтай нөхцөлд ажиллах боломж бүрдэж, албаны бэлэн байдлыг хангах нөхцөл улам бүр сайжрах юм.

Гал түймэр унтраах, аврах 54 дүгээр ангийн хамт олон өнгөрсөн хугацаанд гал түймэр, гамшиг, ослын үед хүний амь нас, эд хөрөнгийг хамгаалж, аймаг орон нутгийнхаа аюулгүй байдлын төлөө тасралтгүй үүрэг гүйцэтгэсээр ирсэн. Тиймээс энэ удаагийн шинэчлэл нь тэдний ажиллах орчныг сайжруулж, үүрэг гүйцэтгэх чадварыг нэмэгдүүлэх чухал алхам болж байна.

Монгол Улсын Засгийн газрын 2020–2024 оны үйл ажиллагааны хөтөлбөр, Ерөнхий сайдын 2025 оны 4 дүгээр сарын албан даалгавар болон Төрийн өмчийн бодлого, зохицуулалтын газрын А/1891 дүгээр албан бичгийн хүрээнд төрийн өмчийн мэдээллийг нэгтгэн, цахим системд бүрэн шилжүүлэх зорилгоор сургалт зохион байгуулж байна. 

Өмчийн бүртгэлийн цахим систем нь төрийн өмчийн бүртгэл мэдээллийн удирдлагын тогтолцоог боловсронгуй болгох замаар төрийн өмчийн үр ашиггүй хөрөнгө оруулалтыг үгүй болгох, ил тод байдлыг хангах, нэгдсэн үр ашигтай болгож сайжруулах зорилготой. 

Монгол улсад төрийн болон орон нутгийн өмчит нийт 7000 гаруй байгууллага байдаг үүнээс Дархан-Уул аймагт орон нутгийн өмчит 104, төрийн өмчит 43 хуулийн этгээд байна. 

2024 оны жилийн эцсийн байдлаар орон нутгийн өмчит 104 байгууллагын нийт 608 тэрбум төгрөгийн хөрөнгө бүртгэгдсэн. Шинэ цахим систем ашиглалтад орсноор нийт хөрөнгийн мэдээлэл иргэдэд нээлттэй болох юм. Тус цахим систем энэ оны 10 дугаар сараас хэрэглээнд шилжинэ.

Дархан хотын баярыг угтан 2025.10.04-05, 2025.10.11-12-ны өдрүүдэд 2 удаагийн давтамжтай "БҮХ НИЙТИЙН ИХ ЦЭВЭРЛЭГЭЭ"-г зохион байгуулж байна. 

Нийтийн зориулалттай орон сууц хариуцсан 45 Сууц өмчлөгчдийн холбоо нь орон сууцны орчмын болон орцны цэвэрлэгээг хийж байна. Үүнд:

- Хороолол доторх авто замын цэвэрлэгээ

- Явган замын цэвэрлэгээ

- Орц цэвэрлэгээ

- Орцны гэрэлтүүлэг, хаалга, цонхны засвар

- Хог, шарилжны цэвэрлэгээ г.м 

 Хот байгуулагдсаны ойн баярыг угтаж оршин суугчид бүх нийтийн цэвэрлэгээнд нэгдэн идэвхтэй оролцохыг дахин уриалъя.

"ЦЭВЭР ХОТЫН ТӨЛӨӨ ХАМТДАА"

МАРГААШ БҮХ НИЙТИЙН ИХ ЦЭВЭРЛЭГЭЭНИЙ ӨДӨР БОЛНО

Сар бүрийн эхний 7 хоногийн бямба гарагийг аймгийн Засаг даргын Захирамжаар бүх нийтийн цэвэрлэгээний өдөр болгон зарласан.

Энэ сарын бүх нийтийн цэвэрлэгээний өдөр маргааш буюу 2025 оны 10 дугаар сарын 04-ний өдөр зохион байгуулагдана.

Иймд иргэд, аж ахуйн нэгж байгууллагууд та бүхнийг бүх нийтийн цэвэрлэгээндээ идэвхитэй оролцохыг уриалж байна.

МЭТГЭЛЦЭЭНИЙ ТЭМЦЭЭН ЗОХИОН БАЙГУУЛЖ БАЙНА

Дархан-Уул аймгийн ЗДТГ, Авлигатай тэмцэх газар, Дарханы мэтгэлцээний нэгдсэн танхим НҮТББ, Их Засаг Олн Улсын Их сургуулийн Дархан-Уул аймаг дахь салбар сургууль хамтран Төрийн албан хаагчдын ёс зүйн шударга байдал, авлигаас ангид байх хандлагыг төлөвшүүлэх, урьдчилан сэргийлэх, мэдлэг, шүүмжлэлт сэтгэлгээг хөгжүүлэх зорилгоор “Мэтгэлцээний тэмцээн”-ийг өнөөдөр /2025.09.26/ зохион байгуулж байна. Тэмцээнд нийт 15 байгууллагын 40 гаруй албан хаагч оролцож мэдлэг оюунаа сорьж байна. Их Засаг их сургуулийн Эрх зүйн 1-р дамжааны оюутнуудад тус тэмцээн практик хичээл болж байна. Мэтгэлцээний дүрмийн дагуу тэмцээнд оролцож буй байгууллагуудын албан хаагчид баг болон хуваагдаж тодорхой өгөгдсөн сэдэв, бодит кейсүүд дээр ажиллалаа. Өнөөдрийн уралдаан тэмцээний үр дүнд төрийн байгууллагууд дотоод хяналт, авлигын эсрэг бодлогоо сайжруулах, албан хаагчид бусдадаа үлгэр дуурайлал үзүүлэх, мэдлэгээ тэлэх зэрэг ач холбогдолтой. Мөн оюутнууд онолоор үздэг хичээлийг практикт хэрхэн туршиж байгааг судлах, ирээдүйн төрийн албанд шаардлагатай ур чадварыг эзэмшихэд ихээхэн хувь нэмэртэй. Түүнчлэн иргэдийн итгэлийг сэргээх, ил тод байдлыг нэмэгдүүлэх стратеги төлөвлөхөд туслах санал санаачилга бий болно гэж зохион байгуулагчид үзэж байна.